Mar 9 | NdeIBE | STEP | Wasesithi kubo, “Ngilitshela iqiniso ukuthi abanye abemiyo khona lapha kabayikukuzwa ukufa bengakawuboni umbuso kaNkulunkulu ufika ulamandla.”

Mark 9

1 Wasesithi kubo, “Ngilitshela iqiniso ukuthi abanye abemiyo khona lapha kabayikukuzwa ukufa bengakawuboni umbuso kaNkulunkulu ufika ulamandla.”

Ukuguquka Isimo

2 Ngemva kwezinsuku ezine uJesu wathatha uPhethro loJakhobe loJohane wakhwela labo entabeni ephakemeyo lapho ababa bodwa khona. Bekhona lapho waguquka isimo phambi kwabo. 3 Izigqoko zakhe zaba mhlophe okukhazimulayo, zaba mhlophe okungazake kwenziwe muntu emhlabeni. 4 Khonapho kwaqhamuka u-Elija loMosi bekhuluma loJesu.

5 UPhethro wathi kuJesu, “Rabi, kumnandi kithi ukuba lapha. Kasakhe izihonqo ezintathu, esinye esakho, esinye esikaMosi lesinye esika-Elija.” 6 (Wayengazi ukuthi athini, babesesaba kakhulu.)

7 Kwafika iyezi labasibekela, kwezwakala ilizwi eyezini lisithi, “Lo yiNdodana yami, engiyithandayo. Yilaleleni!”

8 Khonokho nje bathi bayakhangela kababe besabona muntu eduze kwabo ngaphandle kukaJesu.

9 Bathi sebesehla entabeni uJesu wabanika imilayo yokuthi bangatsheli muntu ngabakubonileyo iNdodana yoMuntu ize iqale ivuke kwabafileyo. 10 Indaba le bayigcina ezifubeni zabo, bebuzana ukuthi, “ukuvuka kwabafileyo” kwakusitshoni.

11 Bambuza bathi, “Kungani abafundisi bomthetho besithi u-Elija kumele afike kuqala?”

12 UJesu waphendula wathi, “Ngeqiniso u-Elija uza kuqala abuyisele izinto zonke esimeni sazo. Kungani pho kulotshiwe ukuthi iNdodana yoMuntu imele ihlupheke kakhulu yaliwe?

13 Kodwa ngiyalitshela, u-Elija usefikile, sebemenze konke ababekufisa kuye, njengoba kulotshiwe ngaye.”

Ukusiliswa Komfana Olomoya Omubi

14 Bathi befika kwabanye abafundi babona bebuthanelwe ngabantu abanengi kulabafundisi bomthetho bephikisana labo. 15 Abantu bonke bonela ukubona uJesu bamangala kakhulu bamgijimela besiyambingelela.

16 Wabuza wathi, “Kuyini eliphikisana labo ngakho na?”

17 Kwaphendula indoda ethile exukwini yathi, “Mfundisi, ngikulethele indodana yami ekhwelwe ngumoya omenza abe yisimungulu.

18 Uthi ungamjuma umlahlele phansi. Usuka abhubhudle amagwebu, agedle amazinyo, ome qha umzimba. Ngibacelile abafundi bakho ukuthi bawukhuphe umoya kodwa behluleka.”

19 UJesu waphendula wathi, “Hawu, lina sizukulwane esingakholwayo, ngizahlala lani kuze kube nini na? Ngilibekezelele kuze kube nini? Mletheni kimi umfana.”

20 Basebemletha kuye. Umoya wonela ukumbona uJesu wamlahla phansi umfana wazigiqagiqa ekhihliza amagwebu ngomlomo.

21 UJesu wabuza uyise womfana wathi, “Sekulesikhathi esinganani enje umfana?” Wathi, “Kusukela ebuntwaneni. 22 Kuhlezi kumphosela emlilweni loba emanzini kufuna ukumbulala. Kodwa aluba kukhona ongakwenza ake usihawukele usisize.”

23 UJesu wathi, “Uthi ‘ongakwenza’? Yonke into iyenzakala kulowo okholwayo.”

24 Masinyane uyise womfana wamemeza wathi, “Ngiyakholwa; ake ungisize ngehlule ukungakholwa kwami!”

25 UJesu esebona ukuthi ixuku laligijimela kuye wawukhuza umoya omubi wathi, “Wena moya oyisacuthe lesimungulu, ngiyakulaya mina, ngithi phuma kuye ungaphindi ungene kuye futhi.”

26 Umoya waklabalala wamgiqa phansi umfana wamhlukuluza waphuma. Umfana wathi daca waba yisidumbu, abanengi bathi, “Usefile.” 27 Kodwa uJesu wambamba ngesandla wamdonsa wammisa ngezinyawo wema.

28 UJesu esesukile wayangena endlini abafundi bakhe bambuza ngasese bathi, “Kungani sehlulekile ukuwuxotsha na?”

29 Waphendula wathi, “Lolu uhlobo luphuma ngomthandazo kuphela.”

30 Basuka kuleyondawo badabula eGalile. UJesu kazange afune ukuthi kube khona owaziyo ukuthi babengaphi, 31 ngokuba wayefundisa abafundi bakhe. Wathi kubo, “INdodana yoMuntu izanikelwa ezandleni zabantu. Bazayibulala, kuthi ngemuva kwezinsuku ezintantu izavuka.” 32 Kodwa kabezwisisanga ukuthi wayesitshoni njalo besaba ukumbuza ngakho.

Ngubani Omkhulu Kulabo Bonke?

33 Bafika eKhaphenawume. Wathi esendlini wababuza wathi, “Beliphikisana ngani endleleni?” 34 Kodwa bathula zwi ngoba endleleni babephikisana ngokuthi ngubani omkhulu kulabanye bonke.

35 Wahlala phansi uJesu wabiza abalitshumi lambili wathi kubo, “Aluba ekhona ofuna ukuba ngowokuqala, kabe ngosekucineni, abe yisisebenzi sabo bonke.”

36 Wathatha umntwana omncinyane wammisa phakathi kwabo. Wamthatha wamgona wathi kubo, 37 “Yilowo owamukela oyedwa walaba bantwana abancinyane ebizweni lami wemukela mina; njalo lowo ongamukelayo kemukeli mina kodwa wamukela lowo owangithumayo.”

Ongaphikisani Lathi Umi Lathi

38 UJohane wathi, “Mfundisi, sabona indoda ikhupha amadimoni ngebizo lakho sayikhuza ngoba ingayisuye omunye wethu.”

39 UJesu wathi, “Lingayikhuzi. Kakho ongenza ummangaliso ngebizo lami aphinde masinyane ajike akhulume okubi ngami,

40 ngokuba lowo ongamelani lathi umi lathi.

41 Ngilitshela iqiniso ngithi lowo olinathisayo amanzi ngebizo lami ngokuba lingabakaKhristu ngempela kayikulahlekelwa ngumvuzo wakhe.

Ukwenzisa Isono

42 “Aluba umuntu ekhubekisa oyedwa walaba abancinyane abakholwa kimi ukuba enze isono, bekungaba ngcono kuye ukuthi aphoselwe olwandle ebotshelwe ilitshe elikhulu entanyeni yakhe. 43 Aluba isandla sakho sikwenzisa ukona, siqume. Kungcono kuwe ukuthi ungene ekuphileni ungungini kulokuya esihogweni ulezandla ezimbili, lapho umlilo wakhona ongacimiyo, ( 44 lapho impethu yakhona engafiyo lomlilo kawucimi). 45 Njalo uma unyawo lwakho lukwenzisa isono, luqume. Kungcono kuwe ukuthi ungene ekuphileni uyisilima kulokuthi ulezinyawo ezimbili uphoselwe esihogweni ( 46 lapho impethu yakhona engafiyo lomlilo wakhona kawucimi.)

47 Njalo uma ilihlo lakho likonisa, likhuphuluze liphume. Kungcono kuwe ukungena umbuso kaNkulunkulu ulelihlo elilodwa kulokuba lamehlo amabili kodwa uphoselwe esihogweni,

48 lapho “ ‘impethu yakhona kayifi, lomlilo kawucimi.’

49 Wonke umuntu uzavuvuzelwa isawudo ngomlilo.

50 “Isawudo lilungile, kodwa nxa lingalahla ubusawudo balo, ungalivuselela njani na? Wobani lesawudo ngaphakathi kwenu, lihlalisane ngokuthula.”